Dathlu 20 Mlynedd o WASPI: Cydnabod Ymroddiad, Cydweithio a Hyrwyddwyr ym maes Rhannu Gwybodaeth
Ddydd Llun 10 Tachwedd cynhaliodd Cytundeb Rhannu Gwybodaeth Bersonol Cymru (WASPI) y gynhadledd Cydweithio, Diwylliant a Dathlu a'r seremoni wobrwyo i ddathlu pen-blwydd y fframwaith yn 20 oed.
Dathlodd y digwyddiad 20 mlynedd o waith cydweithredol i hyrwyddo rhannu gwybodaeth ac egwyddorion llywodraethu gwybodaeth ledled Cymru. Roedd y digwyddiad yn cynnwys gwobrau WASPI 20, a oedd yn cydnabod ymroddiad unigolion, timau a mentrau sydd wedi hyrwyddo rhannu gwybodaeth a safonau llywodraethu dros yr 20 mlynedd diwethaf.
Roedd y pedwar categori gwobrau i gyd yn canolbwyntio ar agwedd wahanol ar lwyddiant y Cytundeb dros yr ugain mlynedd diwethaf:
- Gwobr Cydweithio Rhagorol
- Gwobr Eiriolwr WASPI
- Gwobr Arwr Di-glod
- Gwobr Rhagoriaeth er gwaethaf Anawsterau
Yn ogystal â'r rhain, rhoddwyd llond llaw o wobrau cydnabyddiaeth arbennig hefyd i'r rhai sydd wedi gwneud cyfraniadau sylweddol at y fframwaith.
A dyma gyhoeddi’r enillwyr ...
Gwobr Cydweithio Rhagorol
Roedd yr enwebeion ar gyfer y wobr hon yn hyrwyddo cydweithio mewn mentrau lle mae gwahanol sefydliadau o bob rhan o iechyd, llywodraeth leol, yr heddlu, addysg, neu'r trydydd sector, wedi dod at ei gilydd, wedi'u huno gan fframwaith WASPI i gyflawni rhywbeth gwirioneddol nodedig. Maen nhw wedi profi ein bod ni bob amser yn gryfach, a bod ein canlyniadau i'r cyhoedd bob amser yn well, pan rydyn ni'n cydweithio.
A'r enillydd yw...
Heddlu Dyfed Powys
Am fabwysiadu dull cydweithredol o rannu gwybodaeth ar draws sefydliadau a rhoi cyfle i bartneriaid gwrdd â heriau ac arferion gorau a'u rhannu.
Gwobr Eiriolwr WASPI
Mae'r wobr hon yn cydnabod y person sydd wedi hyrwyddo WASPI yn ddiflino, gan ysgogi newid cadarnhaol o fewn ei sefydliad a thu hwnt. Unigolyn sy'n dod â'r Cytundeb yn fyw, sy'n eiriol dros ei egwyddorion mewn cyfarfodydd, sy'n mentora cydweithwyr, ac sydd wedi gwneud cyfraniad eithriadol at ymgorffori rhannu data fel offeryn strategol er lles.
A dyma gyhoeddi’r enillwyr ...
Wayne Pritchard, Gwasanaeth Carchardai a Phrawf EF, a Mark Russell, Heddlu De Cymru.
Mae Wayne Pritchard wedi trawsnewid rhannu data o fewn Gwasanaeth Carchardai a Phrawf EF dros y blynyddoedd gyda Chytundeb WASPI yn brif ysgogydd ar gyfer cydymffurfiaeth. Mae wedi defnyddio fframwaith y Cytundeb i annog eraill i adolygu a diweddaru eu Protocolau Rhannu Gwybodaeth yn gyson.
Mae Mark Russell yn hyrwyddo WASPI ac yn hyrwyddo mabwysiadu'r fframwaith a deddfwriaeth diogelu data. Mae wedi bod yn gefnogwr brwd o'r Porth Rhannu Gwybodaeth, gan hyrwyddo'r offeryn a'i fanteision a'i ddefnydd i aelodau Sicrwydd Ansawdd eraill ledled y De.
Gwobr Arwr Di-glod
Mae'r wobr hon yn cydnabod y cyfraniad gwerthfawr a wnaed i WASPI a rhannu gwybodaeth yng Nghymru a allai weithiau fynd heb i neb sylwi arno. Gwarcheidwaid ymddiriedaeth y cyhoedd yw'r enwebeion ar gyfer y wobr hon, yr arwyr di-glod go iawn sy'n gweithio'n ddiwyd y tu ôl i'r llenni.
A'r enillydd yw...
Lisa Parry, Bwrdd Iechyd Prifysgol Betsi Cadwaladr.
Mae Lisa wedi bod yn rhan o fframwaith WASPI ers ei sefydlu. Fel Uwch Reolwr Llywodraethu Gwybodaeth, mae Lisa wedi bod yn allweddol wrth ymgorffori fframwaith WASPI yn niwylliant BIPBC, a hyrwyddo egwyddorion rhannu data yn ddiogel ac yn gyfreithlon.
Gwobr Rhagoriaeth er gwaethaf Anawsterau
Mae'r wobr hon yn anrhydeddu unigolyn neu dîm a ddangosodd wydnwch, arloesedd ac ymrwymiad diysgog i egwyddorion WASPI wrth wynebu adfyd sylweddol. Pan oedd pwysau, fe wnaethon nhw ymdopi ac fe wnaethon nhw ragori. Fe wnaethon nhw ganfod ffordd o rannu gwybodaeth yn ddiogel ac yn effeithiol er mwyn cyflawni canlyniad cadarnhaol er gwaethaf pob tebygolrwydd.
A'r enillydd yw...
Helen Parry, Cyngor Gwynedd.
Pan oedd llond llaw o sefydliadau'n datgysylltu o fframwaith WASPI, fe wnaeth ymroddiad Helen i grŵp Sicrwydd Ansawdd WASPI Gogledd Cymru feithrin ymdeimlad o gymuned a phwrpas. Gosododd ei gwydnwch, ei harbenigedd amhrisiadwy a'i harweinyddiaeth sylfaen gref ar gyfer llwyddiant parhaus y grŵp.
Gwobr Cydnabyddiaeth Arbennig
Nid yw adeiladu fframwaith WASPI wedi bod yn hawdd. Mae wedi cymryd amser ac adnoddau, ac mae'r wobr hon yn cydnabod y rhai sydd wedi gwneud cyfraniad sylweddol i WASPI dros yr 20 mlynedd diwethaf drwy roi eu hamser, eu gwybodaeth a'u sgiliau i greu rhannu gwybodaeth gwell yng Nghymru.
Mae eu cyfraniadau'n amrywio o’r canlynol:
- Bod yn rhagflaenwyr y fframwaith – drafftio a llunio’r Cytundeb a’r templedi
- Arwain a gwneud penderfyniadau ar newidiadau i'r fframwaith a'i ddyfodol
- Bod yn rhan o fyrddau cynghori ar newid a rheoli gwasanaethau a Chadeirio grwpiau sicrwydd ansawdd rhanbarthol.
- Hyrwyddo a hybu WASPI
Yr hyn sy'n gwneud WASPI yn arbennig yw ei fod wedi'i adeiladu gan ymarferwyr ar gyfer ymarferwyr ac yn cael ei ddatblygu'n barhaus. Mae'r unigolion hyn wedi arwain y broses hon dros y blynyddoedd ac yn parhau i fod yn rhan ohoni nawr.
A dyma gyhoeddi’r enillwyr ...
Dave Parsons, Iechyd a Gofal Digidol Cymru
Helen Thomas, Swyddfa’r Comisiynydd Gwybodaeth
Jackie Evans, Heddlu Dyfed Powys
John Grenfell, Bwrdd Iechyd Prifysgol Caerdydd a’r Fro
John Sweeney, Iechyd a Gofal Digidol Cymru
Richard Howells, Bwrdd Iechyd Prifysgol Aneurin Bevan
Ryan James, Cyngor Bwrdeistref Sirol Merthyr Tudful
Llongyfarchiadau i’r holl enillwyr ac i bawb a enwebwyd!
Gallwch weld y rhestr lawn o enwebeion ar gyfer pob categori ar wefan WASPI.